Dhaanwade & Dhalandhool 17/12/2011: 4+1, Burcada, Mashaariicda, Dilalka Qorsheysan, & Baarlamaanka Puntland

Dhalandhool : Dhaanwadow waa nabad , hadde Wadankiina maanta buu dariiqii  Dowlad-wanaaga iyo la dagaalanka musuq-maasuqa in wax laga qabto loo sare kacey !. Waa kuwaas Baarlamaankii Puntland la xisaabtan iyo dabagal ku bilaabey Golihii Xukuumada oo maalinba qaar u yeeraya Golihii Wasiirada oo raacii ugu horeeyayna ay soo hor fariisteen . Waxaaba noogu daran kuwa qaarkood waxayba garab mareen ama ayba garan waayeen inuu jiro Gole Sharci dejinta iyo saxida xukuumada bal adba.Nin walbaa meeshii uu hor jooga ka haa buu iskii isaga maamushey talo yar oo ay madaxweynaha weydiiyaan ma ahee, bal xagee bay wax mariyeen intaa waxaan maqalnaa shirkadaa heshiis lala soo galey Badda iyo Dhulkaba (oo Dekado iyo Garoomo ayay durba sameysteen), Mashaariic dhaqaale ayaa intaa la soo saxeexaa meel ay ku baxeen ama laga hir geliyeyna lama arko, deeqo waxbarasho ayaa inaa iska soo daba dhacaya, meeyey Road-mapka la sheegayo iyo waxa uu ka hadlayo midna lama yaqaan, Shirkado intaa maalgelin Hubeed iyo mid Ciidanba ku sameynaya Burcad-badeedka iyo burcad-dhuleedkaba lagama war hayo.Wallee dhaanwadow maanta uun buu baarlamaankii iyo Shacabkii Puntlandba soo jeesteen oo ay inadhaha kor u kala qaadeen , bal aan dhowrno waxa soo socda labo mid bay tegi oo Dalkani dad ayuu yeelan ama Dal aan dad lahayn oo iib ah ayuu noqon !!

Dhaanwade: Dariiqaa ba´yey dhalandhool waa nimaan habeenka iyo maalinta kala garan !. Adeer afarta ay u yeereen iyo Dr. Cali Warsame “4+1” ayaaba intaa maamulka Puntland ee hadda jira soo gaarsiiyey, oo adeer waaba kuwii u soo qaraabi jirey. Waanu ognahay oo nimankaan Baarlamaanka fadhiyaa Ragbaa soo direy oo yiri sii xagxagta aysan doorashada danbe tartanka soo gelin e. Ragga iyo Wasaaradaha la-xisaabtanka u baahan waa la yaqaan adeer haddii Cudurka Dameerka kaa gala aad Faras ka raadiso sow dhibaato ma ahan.  Mida kale hadey dhab ka tahay waxa ay sheegayaan may la xisaabtamaan ninkaan sidii Libaaxii keligii iskudhoonka sameystey oo Barida Subaga ku dhuuqaya oo wuxuu maqlayana iyo cid uu talo weydiinayaanba aysan jirin !, mise arinkoodu waa  tii diraacdii dhaweyd ee Xildhibaan Indhabuur ku dhacdey ( dharbaaxadii dhaban Dhurwaa ku dhacdey  ku quuso ) dabadii maysan hadlin e. Dhalandhool waxaa cad oo aan cidna ka qarsoonayn waa taa ummadii Puntland  sidii Ari Weer galay Oday, Culimo, Aqoonyahan, Ganacsade iyo kuwo kaleba aan midna aan loo hambayn,kuwa dilalka samaynayana ay yihiin kuwo gudaha jooga iyo shirkado la soo ijaartey oo Ajnabi ah, iskaba daaye shacabka Puntland ku nool meelihii ay nolol maalmeedka ka raadsan jireena ee suuqyada ahaa ayaa loo soo direy kuwo guba, taasoo ay ka danbeeyaan fikiro meelo kale laga soo qaatey oo ah “ dadku hadey faqri ama cayr yihiin waa la xukumi kartaan laakiin dad dheregsan lama xukumi karo“. Dherigu marka karka laga badiyo wuu daataa , markan waxaanu sugnaaba waa kacdoonka shacabka iyo dabayshii cadaalada wadatey . Allena hala garab galo Aamiin, Aamiin, Aamiin….!!!

Dhaanwade-Dhalandhool

Iskudhoon: “Waa Geedo isku baxay oo jiq ah , wixii galana aan la arki karin oo uu Libaaxu galo iskuna badbaadiyo “