Madaxweyne Shariif : Somaliland Iyo Shacabkeda Waa In Ay Isku Dhejin Rabitaankooda Ah In Ay Gooni Noqdaan

Dubai (RBC) Madaxweynaha DKMG ah Soomaaliya Shariif Sheekh Axmed ayaa ka hadlay kulankii shaley uu la qaatay dhigiisa Somaliland Axmed Maxamed Maxamuud Siilaanyo.

Madaxweyne Shariif oo xaley ka qeybgalay xaflad ay jaaliyada Soomaalida ku qabtay magaalada Dubai ee dalka imaaradka carabta ayaa sheegay in kulankaas uu ahaa mid ah guul u ah immadda Soomaaliyeed, maadama uu hoosta ka xariiqay in ay la isku afgartay dhamaan qodobada lagu heshiiyay.

Madaxweynaha ayaa yiri ” Waxa aan ugu baaqayaa bulshada ku nool Somaliland in aysan isku dhejin rabitaankooda ah gooni u goosadka, maxaa yeelay dowlasdda KMG ah waxa ay diyaar u tahay xallinta waxa ay tabanayaan dadka ku nool waqooyi galbeed, Waxa aan dooneynaa in aad ka qeybqaadataan wadahadalada dhexmaraya Somaliland iyo Soomaaliya si aan u soo celino Soomaali weyn”

Madaxweynaha ayaa hadalkan ka sheegay kulan xalay magaalada Dubai ee waddanka Isku tagga Imaaraadka Carabta uu kula qaatay Jaaliyadda Soomaaliyeed ee ku nool waddankaas.

Dhina kale, madaxweyne Shariif Sheekh Axmed ayaa sheegay in dowladdiisu ay wax badan ka qabatay dhinacyada ammaanka, siyaasadda, dib-u-dhiska, hirgelinta qodobbadii Road-map-ka.

Wuxuu u sheegay jaaliyada Soomaaldia ee waddanka imaaradka caranta in dhawaan magaalada Muqdisho uu ka billaaban doono shirka ansixinta dastuurka, wuxuuna xusay in shirkaas kaddib ergada ay soo xuli doonaan baarlamaanka cusub, dalkana ka dhici doono doorashooyinka madaxtinnimada oo lagu wado in ay dhacdo 20-ka bisha August iyo wixii ka dambeeya.

Madaxweynaha Soomaaliya waxa kulankaas uu la qaatay jaaliyada Soomaalida ku wehlinayay wasiirka gaashaandhigga ee xukuumadda KMG ahna ra’iisul wasaare ku-xigeen Xuseen Carab Ciise.

Wasiirka oo hadal ka jeediyay goobta kulanka uu ka socday ayaa ugu horreyn Jaaliyadda faahfaahin ka siiyay howlaha ay ciidamada dowladda KMG ah ee Soomaaliya iyo kuwa AMISOM ay ka wadaan dalka, taasi oo ay ugu dambeysay howlgalkii degmada Balcad ee gobolka Shabeellaha dhexe lagu qabtay.

Xuseen Carab Ciise ayaa sheegay in ganacsatada iyo Jaaliyadda Soomaaliyeed ee ku nool Imaaraadka Carabta looga baahan yahay in ay garab istaagaan ciidanka xoogga dalka Soomaaliyeed.

Si kastaba, wafdiga Somalilad ee uu hoggaaminaayay madaxweyne Siilaanyo, waxa ay iyagana kullan la qaateen jaaliyada Somaliland ee ku dhaqan magaalada Dubai kuwaas oo ay uga warbixiyeen heshiiska ka dhacay halkaas.

Madaxweynaha Somaliland waxa ku wehlinaayay kulankaas wasiiradda arrimaha dibadda iyo gaanshandhiga Somaliland, iyo madaxweynihii hore Somaliland Daahir Riyaale Kaahin iyo Eng Faysal Cali Waraabe.

RBC Radio

==============

Xafiiska Wararka Nairobi