Ergada Gobolada Somalilad oo Ka Digay Inay Shirka Ansixinta Dastuurka Isaga Bixi Doonaan Dhaqaale La’aan Darteed

Muqdisho (RBC) Iyadoo maanta [Sabti] lagu wado in markale uu dib u furmo shirkii ansixinta dastuurka ee ka socday magaalada Muqdisho ayaa ergooyin ka badan boqol xubnood oo ka kala yimid gobolada maamulka Somaliland oo shirka ka qeybgalaya waxay ka diugeen inay shirka ka bixi doonaan haddii aan loo fududeyn tasiilaadka ay u baahan yihiin.

Ergadan ka timid deegaanada Somaliland oo ka soo safray magaalooyinka Hargeysa, Burco, Ceerigaabo, Caynabo, Boorame, Sheekh, Seylac iyo Alleybadey ayaa ka cawday in dhibaato dhaqaale ay soo foodsaartay ergadooda oo illaa hadda aan laga bixin hoteladii ay deganaayeen.

“Waxaanu nimid maalintii bishan ay ahayd 9-ka July, illaa hadda wax soo dhoweyn maanu helin, cid nootimid ma jirto, hoteladii waanalagu leeyahay, jeebkeena ayaanu iska bixinaa” sidaasi waxaasheegtay Hodan Cige oo ka mid ah ergada ka timid magaalada Burco oo u hadashay ergada deegaanada Somaliland.

Hodan waxay sheegtay in maalin kasta oo ay tagayaan madasha shirka ay iska bixiyaan min labaatan doolar qofkii oo ay baabuur ku kireystaan, dawlada ku-meelgaarkuna aysan wax gaadiid ah u diyaarin ergada ka timid gobolada fog fog ee dalka.

“Anagoo og amaanka Mudisho ayaanu nafteena ku soo biimeynay, waxaana fileynay soo dhoweyn iyo qadarin inay dawlada noo sameyso, laakiin cid ma aanu arag, waxaanago’aansanay in haddii aan tasiilaadkeena naloo fududeyn inaanu dib ugu laabano deegaankii aan ka nimid”  Axmed Nuur Xasan oo ka mid ah ergada ka timid Magaalada Sheekh ayaa isaguna saaka u sheegay warbaahinta gudaha.

Ergooyinka waxay kaloo ka cabanayaan dhanka amaanka oo aan la siin ciidan boolis ah oo la socda xaalada hotelada ay degan yihiin.

Cabashada ergooyinka deegaanada Somaliland ee haatan soo shaac baxday ayaa ku soo aaday iyadoo wasiirka dastuurka DKMG ah C/raxmaan Xoosh Jibriil oo Khamiistii hadal u jeediyey ergooyinka uu shaaca ka qaaday in dhaqaalihii loogu talagalay shirka ansixina dastuurka aanu weli soo gaarin dawlada.

“Waxaan ka xunahay in qolyihii deeq bixiyaasha aysan weli nasoo gaarsiin dhaqaalihii shirka lagu wadi lahaa oo ay horey u balanqaadeen” ayuu yiri wasiirka dastuurka.

Dawlada KMG ah ayaa sheegtay in ergay kasta oo shirka ka qeybgalaya loogu talagalay $65 (lixdan iyo shan doolar) maalintii taasoo ergooyinku ay sheegeen inaysan ku filneyn inay ku daboolaan noloshooda iyo hotelada ay degan yihiin iyadoo weliba lagu guda jiro bisha Ramadaan.

Warar ku dhow madasha shirka ayaa sheegaya in xaaad dhaqaale xumo ay soo foodsaartay shirkaansixinta dastuurka taasoo laga yaabo inay hakad kale ku keento shirka haddii aysan dawlada helin xal kale.

 

RBC Radio
Xafiiska Wararka Muqdisho