Safiirka Britain Oo Gacanta U Galiyay Labada Ciyaartooy Ee Soomaaliya U Matalaya Olombikada Adduunka Fiisihii Ay Ku Tagi Lahaayeen London

Muqdisho (RBC) Danjiraha dowladda Britan u qaabilsan Soomaaliya Matt Bough oo maanta booqasho ku yimid Mudisho, ayaa waxa uu kullan la qaatay ra’iisal wasaaraha Soomaaliya Cabdi Wali Cali Gaas, iyo ciyaartooyda Soomaaliya u mataleysa tartamada Olombikada aduunka.

Shir jaraa’id oo danjiraha iyo ra’iisal wasaaraha u qabteen saxaafadda, ayuu Matt Bough kaga hadlay arrimaha uu u yimid Muqdisho, waxana uu sheegay in Muqdisho maanta u yimid siddii uu fiisaha ama dalka ku galka UK uu ugu wareejin lahaan labadda ciyaartoy ee Soomaaliya uga qeybgaleysa ciyaaraha Olombikada aduunka oo 27-ka bishan ka furmaya magaalada London.

Mr. Bough ayaa sheegay in uu aad ugu faraxsan yahay, in uu la kulmo ciyaartooyda Soomaaliya uga qeybgaleysa tartamada Olombikada aduunka oo sannadkan 2012-ka ka dhacaya magaalada London ee dalka Britain.

Wuxu sheegay ciyaaraha ciyaaraha adduunka ee sannadkan in ay ka qeybgalayaa ilaa dhowr kun oo ciyaartooy oo ka kala socda aduunka oo dhan, oo ay ka mid tahay Soomaaliya. waxana uu sheegay in uu ku faraxsan yahay in Soomaaliya 20-sanno kaddib lagu arko ciyaaraha aduunka.

Intaa kaddib waxaa saxaafadda la hadlay ra’iisal wasaaraha Soomaaliya Dr. Cabdi Wali Cali Gaas, waxana uu sheegay in uusan dareenkiisa soo koobi karin, maadama markii ugu horreysay ee Soomaaliya muddo 21-sanno Soomaaliya ay ka qeygaleyso Ciyaaraha caalamiga.

“Dareenkayga maanta lama soo koobi karo, waayo ciyaartooy da’yer oo aan helin dhaqaale ayaa ka qeybgalaya tartamada adduunka , waxa aan u rajeyneynaa Zamzam iyo Maxamed guul ay u soo hoyaan Soomaaliya oo dhan”

Waa markii ugu horreysay oo muddo labaatan sano ah magaalada Muqdisho dal ku galka Britain lagu siiyo Ciyaartooy Soomaaliya u mataleysa tartamada caalamiga.

Intaa kadidb waxa uu sheegay ra’iisal wasaaraha in dib loo soo celin doono ciyaarihii gobalada Soomaaliya, si loo xoojiyo ciyaaraha dalka, waxana kulankaas looga hadlay kullankii golaha wasiirada ee shaley.

Ugu dambeyn waxa ka hadlay kulanka labada ciyaartooy ee Soomaaliya u mataleysa ciyaarha Tartamada Olombikada adduunka, kuwaas oo kala ah Maxamed Xasan Maxamed iyo Zamzam Maxamed Faarax, waxana ay guulo u soo hoyi doonaan Soomaaliya.