Muqdisho: Awoodii Xukuumadda KMG ah oo Gebi Ahaan Ay La Wareegeen Agaasimayaasha Wasaaradaha

Muqdisho (RBC) Iyadoo waqtiga xukuumadda KMG ah ee hadda ka talisa Muqdisho uu dhamaanayo loona diyaargaroobayo doorasho  madaxda kumeelgaarka ay ku jiraan tartankeeda ayaa waxaa xalay shir deg deg ah isugu yimid dhamaan agaasimayaasha guud ee 18-ka wasaaradood ee ay ka kooban tahay xukuumadda KMG ah.

Kulankan oo ka dhacay xarunta wasaaradda gaadiidka cirka iyo dhulka ee magaalada Muqdisho ayaa waxaa si rasmi ah looga dhawaaqay in awoodii xukuumadda ee fulinta ay la wareegeen agaasimayaasha guud kadib markii sida la xaqiijiyey wasiiradii dawlada iyo madaxdii sare ay dhamaantood isu bedeleen musharixiin u ordeysa madaxtinimo iyo qaar u ordaya baarlamaanka.

Agaasimayaasha guud ee 18-ka wasaaradood ayaa isku raacay in mudada 14-ka maalmood ee ka harsan xukuumadda hadda jirta ay iyaga saaran tahay masuuliyadda xukuumadda ee dhanka fulinta, waxaana agaasime kasta lagu wargeliyey inuu qaato waajibkii wasiirka wasaarada uu joogo.

Waxaa kulanka si gaar ah looga hadlay arimaha amaanka, dhaqaalaha iyo nidaamka oo si weyn loogu celceliyey in ladhowro maadaamna ay doorasho dhacayso ayna dhici karaan falal amaandari ama in hantida dawlada la xado taasina loo baahan yahay in laga hortago.

Gabagabadii kulanka ayaa si wadajir ah waxay 18-ka agaasime guud ee wasaaradaha dawlada ay sheegeenin wixii hawl ah ee wasaaradaha ka socday iyaga looga dambeeyo iyagoo shaqaalaha wasaaradaha joogana u ballanqaaday in shaqada ay sii socon doonto ayna heli doonaan xuquuqdooda shaqo.  Waxay sidoo kale agaasimayaasha soo jeediyeen in la kordhiyo wada shaqeynta wasaaradaha.

Kulankan ayaa ku soo beegmay xilli ay mushahar la’aan yihiin dhamaan shaqaalaha dawlada mudo saddex bilood ah, isla markaana shaqaalaha qaarkood ay shaqooyinka isaga tageen maadaama ay og yihiin inaysan heli doonin wax lacag ah mar addii madaxdii ay olole ku jiraan.

 

 

RBC Radio
Xafiiska Wararka Muqdisho