Odoyaal Iyo Waxgarad Ku Eedeeyay Madaxweyne Shariif Inuu Faraglin Weyn Ku Haayo Soo Xulida Baarlamaanka

Muqdisho (RBC Radio) Odoyaal iyo waxgarad ka soo jeeda gobalka Shabeelaha dhexe ayaa kulan ay ku yeesheen magaalada Muqdisho waxay ku soo saareen mudane ay sheegeen in uu yahay midka u matalaya baarlamaanka cusub ee Soomaaliya.

Odoyaashaan iyo waxgaradkaan kulanka ku yeeshay Muqdisho ayaa ugu danbayntii waxay soo saareen C/Qaadir Cosoble Cali oo ay sheegeen in uu yahay midka kaliya ee u taagan gobalkaas ee umatalaya baarlamaanka cusub.

Waxgaradkaan ayaa waxay sheegeen mudanahaan in ay u gudbiyeen odoyaasha dhaqanka laakiin uu ka soo horjeestay in uu ka soo mid noqdo baarlamaanka cusub mudanahaan madaxweyne Shariif Sheekh axmed.

Odoyaal dhaqameedyada ayaa sheeay in madaxweyne shariif uu yiri ninkaan maadaama aanan codkiisa halaynin kama soo mid noqonayo baarlamaanka cusub ee Soomaaliya ee badalaya Baarlamaanka hada jira.

Sidoo kale waxgaradkaan ayaa waxay baaq u jeediyeen dowladaha Caalanka iyo qaramada midoobay waxayna ugu baaqeen in ay arintaan arkaan in faragalin wayn lagu haayo soo xulida baarlamaanka.

Arimahaan ayaa waxay ku soo adayaan xili haatan ay socoto soo xulida baarlamaanka cusub ee Soomaaliya, ee la doonayo in uu badalo baarlamaanka hada jira ee faraha badan, oona la doonayo in dhowaan lasoo gaba gabeeyo.

Dhowaanahaanba waxaa lagu eedaynayay madaxda ugu saraysa dowlada Soomaaliya in ay faragalin weyn ay ku leeyihiin soo xulida baarlamaanka maadaama dhamaantoodba ay yihiin musharixiin u taagan xilka madaxtinimo ee Soomaaliya.

 RBC Radio

Xafiiska Wararka Muqdisho