Rabshado Hargeysa ku dhex-maray Ciidanka Booliska iyo Qaxooti Itoobiyaan ah oo sababay dhaawac badan

Hargeysa(RBC):- Sagaal qof oo isugu jira 5 Askari oo Booliska Somaliland ka tirsan iyo 4 qof oo qaxooti Itoobiyaan ah oo Hargeysa ku sugan, ka dib markii iska-horimaad Xaafadda Shacabka ee magaalada Hargeysa ku dhex-maray ciidanka ammaanka iyo dad qaxooti Itoobiyaan ah oo Oromo u badan.

Iska horimaadka Booliska Somaliland ee magaalada Hargeysa iyo qaxootiga dhex-maray, ayaa yimi ka dib markii ay Ciidammada Boolisku isku dayeen inay dadkaas oo muddo sagaal bilood ka badan degganaa Guri uu Xaafadda shacabka ku leeyahay nin reer Somaliland ah, kaasoo u kiraysnaa Hay’adda Qaxoontiga adduunka u qaabbilsan Qaramada Midoobay ee UNHCR oo ugu talagashay gurigaan in lagu xannaaneeyo, isla markaana lagu quudiyo dadka xanuunsanaya ee qaxootiga ah, balse ay 10 bilood ka hor qaab muddaharaad ah u degeen illaa saddex boqol oo qoys oo qaxootiga Itoobiya ee Hargeysa deggan ah.

Dadka qaxootiga ah oo hore u diiday inay ka baxaan gurigaas, ayaa ciidanka Booliska ee maanta halkaa u tagay inay guriga ka saaraan kala horyimi Faashash iyo Budhadh, isla markaana waxay dhaawacyo u geysteen shan Askari oo ka tirsan Booliskii goobtaas tagay, halka Booliskuna ay dhaawacyo gaadhsiiyeen afar qof oo ka tirsan qaxoontiga Itoobiyaanka ah ee gurigaa muddada sannadka ku dhaw degganaa.

Sababta dadkan qaxoontiga ahi u degeen gurigaas, waxay ku sheegeen markii ugu horreysay dabayaaqadii sannadkii tagay ee 2011, inay UNHCR ka joojisay lacag gunno ah oo ay siin jirtay dadka qaxoontiga ah, taasoo xaddigeedu dhammaa 60$ (lixdan Doollar), ka dibna ay muddaharaadka ay ku degeen gurigan oo la odhan jiray xarunta quudinta qaxootiga oo ku dhaw Hay’adda qaxoontiga u qaabbilsan Qaramada Midoobay Xafiiskeeda Hargeysa, si ay hay’addaa culays ugu saaraan inay u soo celiso gunnada ay ka joojisay.

Wasiirka arrimaha gudaha Somaliland Maxamed Nuur Carraale (Duur) oo bishii Janaayo ee sannadkan ka hadlay, ayaa sheegay inay qaxootigaasi si sharci-darro iyo xoog ah ku deggan yihiin gurigaas oo uu leeyahay muwaaddin u dhashay Somaliland, isaga oo xusay inay qaxoontigan Itoobiyaanka ahi doonayaan inay ku qasbaan hay’adda UNHCR inay qasab kaga dhoofiso Somaliland oo ay u dhoofiso Yurub iyo Maraykanka oo qaybo hore oo qaxootiga Itoobiya ka tirsanaa oo Somaliland ku sugnaa Hay’addani si baqtiyaa-nasiib ah ugu qaadday, ka dib markii ay dawladaha waddammada Yurub iyo Maraykanku ka aqbaleen inay qaxoonti ahaan u qaabbilaan dadka Itoobiyaanka ah ee ay ka soo qaadayaan waqooyiga Soomaaliya (Somaliland).

 

RBC Radio

Xafiiska wararka ee Hargeysa.