WARARKII UGU DAMBEEYAY: Magacyada Shakhsiyaadka Saacadihii u Dambeeyay Laga Soo Celiyey Liiska Xildhibaanada Baarlamaanka Cusub

Muqdisho (RBC) Iyadoo weli meel xasaasi ah ay mareyso xulidii xubnaha baarlamaanka cusub ee Soomaaliya ayaa waxaa soo baxaya in shakhsiyaad cusub saacadihii u dambeeyay laga soo saaray liiskii xildhibaanada cusub ee ay gudbiyeen odayaasha dhaqanka ee beelaha qaarkood.

Xubnaha la soo celiyey oo ay ku jiraan siyaasiyiin caan ah ayaa lagu eedeeyay inay shakhsiyaadkan ay celiyeen ay ka mid ahaayeen qabqablayaasha dagaalka isla markaana hanjabaado ay u gudbiyeen xubnaha guddiga xulista ee baarlamaanka.

Haddaba dadka la soo celiyey oo Raxanreeb ay heshay magacyadooda waxaa ka mid ah;

1- Xasan Macalin (beesha Hawiye)- Wasiiru dawlihii hore ee madaxtooyada DKMG ah sidoo kalana xildhibaan ka ahaa baarlamaankii hore.  (Xasan wuxuu ka tirsan yahay kooxda Aala Sheekh)

2- Sheekh C/qaadir Cali Cumar (beesha Hawiye)- oo ahaa gudoomiyihii maxkamadaha Islaamiga ee gudaha ee loo yaqaanay “muqaawamada”.  Sheekh C/qaadir wuxuu kaloo wasiir arimaha gudaha u ahaa xukuumadii Cumar C/rashiid ee la dhisay 2009.

3- Dr C/casiis Sheekh Yuusuf (beesha Dir)- oo ah wasiirka caafimaadka ee hadda (xukuumadda C/weli Gaas). Dr. C/casiis wuxuu sidoo kale wasiirka caafimaadka ka noqday xukuumaddii Cali Maxamed Geedi.

4- C/laahi Sheekh Ismaaciil (beesha Dir)- oo DKMG ah mar ka noqday wasiirka arimaha dibadda, mudo dheerna ahaa xildhibaan ka tirsan baarlamaanka KMG.

5- C/raxmaan Xaaji Aden Ibbi (beesha Dir)- oo wasiirka kalluumeysiga ka soo noqday xukuumaddii Cumar C/rashiid 2009, sidoo kalana xildhibaan ka ahaa baarlamaanka.  Ibbi waxaa si gaar ah loogu eedeeyay inuu u hanjabay xubnaha guddiga xulista baarlamaanka oo uu ugu goodiyey dil.

C/raxmaan Ibbi weli wuxuu ka tirsan yahay kooxda Aala Sheekh.

Soo celinta xubnahan ayaa waxaa ka dhalatay dood adag, kadib markii odayaasha beelahooda ay sheegeen inaysan aqbalayn sida guddiga xulista ay wax u wadaan, waxayna odayaasha beelaha ay raggan ka soo jeedaan ku goodiyeen inay baarlamaanka ka bixi doonaan haddii aan laga aqbalin ragga ay keensadeen.  Haddiise ay dhacdo in guddiga ay dib u aqbalaan xubnaha ay celiyeen waxaa dhici karta in beelihii horey dadka qaar looga celiyey ay iyaguna so laba kacleeyaan.

Waxaa isaguna booska xildhibaanimada waayey Sheekh Daahir Maxamuud Geelle (oo ah wasiirkii hore ee warfaafinta) haatana hogaamiya Madasha Daljir inkastoo la sheegay in Daahir isqabqabsi dhanka beesha uu ku waayey booska xildhibaanimada.

Dhanka kale, sida xubnaha guddiga xulista ay u sheegeen Raxanreeb waxaa liiska xildhibaanada baarlamaanka ay hadda marayaan 240 mudane oo ah tirada illaa hadda la aqbalay, waxaase laga warsugayaa in beryaha soo socda la dhameystiro tirada ka dhiman xubnaha guud ee baarlamaanka oo ah 275 mudane.

Xubnaha guddiga xulista ayaa rajo wanaagsan ka qaba in maalmaha fooda nagu soo haya si rasmi ah loo soo afmeero xulista baarlamaanka cusub kadibna la gudagalo doorashooyinka loo ballansan yahay in dalka ka dhacaan.

 

RBC Radio

 

______________________________________________________________________
Sixitaan: Tirada guud ee baarlamaanka waa 275 ee maahan 284 sida ku jirtay qoraalkeenii hore.  Wan u mahadcelineynaa akhristayaasheena sida deg dega ah noo soo wacay, kuwa emailada nasoo gaarsiiyey iyo qaar kale oo commentiga ku soo qoray intaba.