Afhayeenka UN oo Ka War-Wareegay Inuu Ka Wajaabo Su’aalo Ku Saabsan Xasuuqii Janaay Cabdalla Iyo Mahiga oo Ka Dhuuntay Shir Jaraa’id (Warbixin+Video)

New York (RBC) Afhayeenka Qaramada Midoobay Martin Nesirky ayaa si cad uga wareegtay su’aalo adag oo laga weydiiyey cida sharciyan qaadeysa masuuliyada dilkii 7 ruux oo rayid Soomaali ah oo Sabtidii [23/09/2012] askarta Kenya ku dileen deegaanka Janaay Cabdalle oo 60k u jira magaalada Kismaayo ee xarunta gobolka Jubbada Hoose. Akhri xasuuqa Janaay Cabdalle

Ciidamada Kenya waxay ku biireen ciidamada AMISOM sanadkan gudihiisa waxaana ogolaanshaha siiyey Qaramada Midoobay, haddaba afhayeenka Qaramada Midoobay Martin Nesirky ayaa shalay markii ugu horeysay ka oo muuqday shir jaraa’id oo ka dhacay xarunta Qaramada Midoobay kaasoo wariyaasha su’aalo kaga weydiinayeen kulanka golaha guud ee Qaramada Midoobay.  Intii uu socday shirka jaraa’id ayaa suxufiyiintu weydiiyeen “Ciidamada Kenya dad shacab ah ayey ku dileen Soomaaliya waxayna ka mid yihiin Kenyanka askarta AMISOM ee ay UN-ka siiyeen ogolaanshaha, marka waa kuma cida dusha u ridaneysa masuuliyadda?”

Markii Martin Nesirky su’aashaasi la weydiiyey wuxuu ku jawaabay:

“Waxaan ku baaqeynaa in Kenya ay xadido khasaaraha shacabka sida ugu sareysa..” ayuu yiri.

Laakiin wariye ka tirsan Shabakada Innercity Press ayaa markale su’aasha ku soo celiyey iyadoo kooban wuxuuna yiri “YAA QAADANAYA MASUULIYADA?”  HALKAN KA DAAWO VEDIO SU’AALAHA XASAASIGA AH

Hase yeeshee Martin Nesirky oo aad uga kululaaday su’aashaasi ayaa ku jawaabay: “Mar hore ayaan ka jawaabay su’aashaasi,.. ee laakiin su’aashaasi waxaad hor dhigtaan Mahiga [ergeyga Qaramada ee Soomaaliya]..”

Mahiga oo dhuuntay

Sida baalantu ahayd shalay galab abaare 4:00pm waqtiga New York ayaa lagu waday in isaguna uu shir jaraa’id qabto wakiilka gaarka ee Qaramada Midoobay u Qaabilsan Soomaaliya Augustine Mahiga oo hadda ku sugan New York, waana shirkaasi midka ay wariyaasha isu diyaariyeen, laakiin nasiib darro wax yar ka hor waqtigii shirkaasi waxaa suxufiyiinta lagu wargeliyey in Mahiga uu baajiyey shirkii jaraa’id!!!

Haddaba yaa ka jawaabaya su’aashaasi weli taagan???

Waxaa xusid mudan in toddobaadkii hpore danjiraha UK u jooga xarunta Qaramada Midoobay Mark Lylall Grant oo ka hadlay sharciyada ciidamada Kenya ee jooga Soomaaliya uu si cad u sheegay in maraakiibta Kenya iyo ciidamadeeda badda aysan qeyb ka ahayn ciidamada AMISOM ee fasaxa ay siisay Qaramada Midoobay, [Halkan ka akhri warbixinta danjiraha UK] arintaasoo si weyn u dhaawacday una ruxday Qaraarkii Golaha Amaanka Qaramada Midoobay ay ku fasexeen ciidamada Kenya ee galay Soomaaliya.

Shir yaraha Soomaaliya 

Wariyaasha adduunka iyo kuwa daneeya arimaha Geeska Afrika ee ku sugan xarunta Qaramada Midoobay ayaa isha ku haya shir yare muhim ah oo arimaha Soomaaliya looga hadli doono bishan Sebtember 26-keeda oo ku beegan maalinta berito [Arbaco] kaasoo lagu wado in xasuuqa shacabka Soomaaliyeed ee ay Kenya geysatay looga hadlo, haddii ajendaha lagu soo daro. Shirkaasi waxaa khudbad ka jeedin doona sii hayaha xilka raysul wasaaraha Soomaaliya C/weli Maxamed Cali Gaas oo hadda ku sugan New York.

Haddaba shirkaani kadib ayaa suxufiyiintu isu diyaarinayaan inay su’aalo fara badan oo ku saabsan arimaha Soomaaliya ayna ku jirto “YAA QAADAYA MASUULIYADA DILKA RAYIDKA?” la hordhigo saraakiisha Qaramada Midoobay iyo kuwa Soomaalida.

Kala soco Raxanreeb wxixii laga dhaho jawaabta su’aashaasi.

 

_________________________________________________________________

RBC Radio