Gudoonka Baarlamaanka Soomaaliya oo Raxanreeb Uga Mahadceliyey Sirtii La Kashifay Ee Musuqmaasuqa Baarlamaanka

Muqdisho (RBC) Guddoonka baarlamaanka cusub ee Soomaaliya ayaa caawa ugu hambalyeeyey shabakada Raxanreeb warbixintii sirta ahayd ee shalay lagu daabacay Raxanreeb taasoo shaaca ka qaaday qorshe musuqmaasuq ah oo lala damacsanaa in lagu sameeyo doorashada madaxtinimada dalka ee caawa ka dhacday magaalada Muqdisho.

Mid ka mid ah masuuliyiinta gudoonka baarlamaanka oo si gaar ah u codsaday inaan la maghacaabin ayaa Raxanreeb ku tilmaamay il wareed aad u muhim ah oo ka diga dhacdooyin badan isagoo sheegay in Raxanreeb baarlamaanka Soomaaliya ka caawisay in la ogaado qorshayaal ku soo fool lahaa baarlamaanka.

“Runtii saxaafada markay si fiican u shaqeyso waxay noqon kartaa mid khataraha ka digta isla markaana saadaalisa wixii mushkilad ku ah ummada aayahadeeda, sii wada shaqada wanaagsan” ayuu yiri masuulka.

Qorshahan sirta ahaa ayaa yimid kadib markii Shariif Axmed uu walaac ka muujiyey in xildhibaanada lacagaha faraha badan ka qaatay ay dhici karto inay musharixiin kale u codeeyaan maadaama codeynta ay tahay qarsoodi, si taasi ay u dhicina loo baahan yahay wax looga hortago.

Shariif Xasan oo hadda hogaanka u haya ololaha Shariif Axmed ayaa dejiyey qorshe halis ku ah xildhibaanada baarlamaanka, Waxaana Raxanreeb u suurtagashay in ilo xogaal ah ay u soo gudbiyaan tallaabooyinka la dejiyey ee la damacsanaa in maalinta Isniinta [masanta]  laga fuliyo baarlamaanka dhexdiisa inta ay scoto doorashada. Halkan ka akhri warbixinta

Qorshaha fashilmay ee musuqmaasuqa ahaa oo la fasdhiliyey

Waxaa nasiib weyn ahaa in gudoonka baarlamaanka Soomaaliya ay noo sheegeen in warbixintii lagu daabacay bogga Raxanreeb loo adeegsaday si wargelin ah isla markaana la qaatay tallaabooyin looga hortagayo qorshayaasha musuqmaasuqa.

Gudoonka baarlamaanka waxay si xirfad leh u joojiyeen saddex arimood oo waaweyn oo la damacsanaa in baarlamaanka dhexdiisa ay ka geystaan taageerayaasha labada Shariif, waxayna arimahaasi ahaayeen sidan;-

1- In xildhibaan kasta oo labada Shariif ay wataan lagula ballamo in SAWIR ka soo qaado warqadiisa codeynta isla marka uu ku jiro qolka yar ee codkiisa uu ku soo xariiqayo, waxaana sawirka uu ku soo qaadayaa telefoonkiisa/telefoonkeeda gacanta [mobile] si loo xaqiiqsado inuu u soo codeeyay SHARIIF. Balse waxaa nasiib wanaag ahayd in maanta doorashadii dhacday laga mamnuucay xildhibaanada waqtiga codeynta inay wax telefoon ah soo qaataan oo kursiga ayey kaga soo tagayeen.

2- Arinta labaad; Waxaa la diyaariyey waraaqo codeyn oo u dhigma tirada baarlamaanka “275? taasoo ay gaar u heystaan Labada Shariif iyadoo uusan ka warheyn gudoonka baarlamaanka.  Waxaa waraaqahan loogu talagalay in iyagoo diyaarsan la siiyo xildhibaanada taageerayaasha u ah labada Shariif si looga ilaaliyo in qaar ka mid ah xildhibaanada ay codkooda la dhuuntaan. Waxaase xusid mudan in qorshahan uu fashilmay kadib markii gudoomiyaha baarlamaanka uu keensaday SHAABAD u gaar ah iyo saxiix uu ku dhufanayo warqadaha codeynta si looga digtoonaado in waraaqo “been abuur ah” la soo geliyo.

3-Waxaa kaloo qorshuhu ahaa in labada Shariif ay soo geliyaan baarlamaanka gacan yarayaashooda faraha badan kuwaasoo soo sameystay kaarar aqoonsi oo qaarkood ay ku qoran yihiin marti, qarna ay ku qoran yihiin ciidamada amaanka si ay iyaguna uga qeybqaataan qorshaha lasoo maleegay ee baarlamaanka laga fulinayo maalinta doorashada. Gacan yarayaasha ayaa la rabay in loo adeegsado in xildhibaan kasta [kuwa lacagta qaatay] ay ka hubiyaan inay ballantii ka soo bexeen iyo in kale, hase yeeshee waa wax lala yaabo ahayd maanta in gudoonka baarlamaanka iyo guddida doorashada ay si adag ula dagaalameen in xid aan xildhibaan ahayn ay dhex fariisato baarlamaanka arintaasoo waqti iyo dadaal lagu bixiyey lagana hortagay.

Akhri warbixintii sirta ahayd

————————————————————————————————
RBC Radio