Madaxweyne Siilaanyo oo Wakaalado madax-bannaanaa hoos-geeyey Wasaaradda hawlaha guud
Xuquuqda Qoraalada, sawirada iyo warbixin kasta waxay gaar u tahay Raxanreeb.com (RBC Radio). Lama adeegsan karo, dib looma daabici karo, lama baahin karo ama kambayuutar laguma keydsan karo si toos ah iyo si dadban intuba, haddii aan fasax laga heysan maamulka Raxanreeb.com (RBC Radio). Fadlan hana xadin
Hargeysa(RBB):- Madaxweynaha Somaliland Axmed Maxamed Maxamuud (Siilaanyo), ayaa amray in Wakaaladaha Korontada magaalooyinka Hargeysa iyo Berbera oo hore gaarkooda ugu madax-bannaanaa ay hoos-tagaan maamul ahaan Wasaaradda hawlaha guud, gaadiidka iyo guryeynta Somaliland.
Madaxweynaha Somaliland Axmed-Siilaanyo, waxa uu soo saaray Xeer Madaxweyne, sidaana waxa lagu sheegay War-Saxaafadeed uu ku saxeexnaa Afhayeenka Madaxweynaha Axmed Saleebaan Dhuxul, kaasoo maanta ka soo baxay madaxtooyada waxa uu u qornaa sidan.
Waxaana qoraalka Xeerka Madaxweynaha lagu sheegay inuu Madaxweyne Siilaanyo u cuskaday qodobbo dastuurka Somaliland ka mid ah go’aanka uu Wakaaladaha korontada ee Berbera iyo Hargeysa ku hoos-geeyey Wasaaradda hawlaha guud, guryeynta iyo gaadiidka.
“Markuu arkay;In baahi weyn loo qabo dardargelinta, maamulka iyo hawlaha
horumarineed ee Hay’addaha Korontoda, markuu tixgeliyey;Talooyinkii mas’uuliyiinta kala duwan, markuu Tixgeliyey;Ahmiyadda weyn ee Hay’addaha korontadu ugu fadhiyaan
dhismaha dawladda.
Wuxuu soo saaray Xeerkan In Hay’addaha korontada ee Magaalooyinka Berbera iyo Hargeysa la hoosgeeyo Wasaaradda Hawlaha Guud, Gaadiidka iyo Guriyeynta; xisaabta iyo dakhliga wakaaladdahaasina ay ku dhacayaan qasnadda dawladda Dhexe, kharashkuna u soo noqdo si waafaqsan nidaamka xisaabaadka dawladda dhexe.” Sidaa ayaa lagu yidhi War-saxaafadeedka ka soo baxay xafiiska Afhayeenka madaxtooyada Somaliland.
RBC Radio
Xafiiska wararka ee Hargeysa.
