Musharax Salaad Cali Jeelle oo Jeediyey ‘Khudbadii ugu Qosolka Badneyd’ Khudbadihii Maanta (Daawo)

Muqdisho (RBC) Waxaa goordhow soo dhamaaday khudbadihii musharixiinta u taagan tartanka madaxtinimada Soomaaliya oo ay ka horjeedinayeen golaha baarlamaanka Soomaaliya.

Musharax Salaad Cali Jeelle oo ka mid ahaa 10-kii musharax ee maanta khudbadahooda jeediyey ayaa noqday ninka jeediyey khubada ugu qosolka badneyd dhamaan khudbadaha iyadoo mudada 20-daqiiqo ah ee uu hadlayey ay aamusi waayeen xildhibaanada iyo martida kale hoolka fadhiday qosol dartiis.

Waxyaabaha uu Salaad Cali Jeelle ka hadlay waxaa ka mid ahaa isbarid uu ugu horeyn sameeyay, sababaha ku kaliofay musharaxnimada oo uu faahfaahin ka bixiyey iyo waxqabadka uu rajeynayo inuu ku dhaqaaqo arimahaasi oo dhamaantood xiise lahaa.

“Aniga magaceyga waxaa la yiraahdaa Salaad Cali Jeelle. Wasiir kuxigeenkii arfaafinta waan soo ahaa. Wasiir ku xigeen gaashaandhiga waan soo noqday, sidoo kalana xildhibaan ayaan ahaa” ayuu yiri Salaad Cali Jeelle bulawgii khudbadiisa oo waraaqo ugu qorneyd.

“Waxaan ahaa ninkii aas aasay wasaaradda warfaafinta, Ciidamada Amisom anigaa keenay dalka kadib markaan ogaaday in maleeshiyo beeleedyada iyo xagjirka ay weeraraan ciidamada qalabkasida, waxaana Amisom ku soo dhoweeyay garoonka diyaaradaha… Yaa ila sheegan kara” ayuu Salaad weydiiyey xildhibaanada iyo musharixiinta oo si weyn u qoslay sacabna ugu daray.

Isagoo si weyn loogu sacabtumay bilawgii ayuu Salaad Cali Jeelle bilaabay inuu ka hadlo sababaha ku kalifay inuu isu sharaxo madaxtinimada Soomaaliya.

“Sidaad la socotiin waxaan ahay musharax madaxweynaha dawlada federaalka Soomaaliya, waxaana ahay oday waayo arag ah oo mudo soo joogay, waxaan goobjoog u ahaa madaxdii soomartay dawlada oo sharciga aan ku dhaqmeyn” ayuu yiri Salaad.

Wuxuu sheegay in shaqo uu isaga qabtay ay dad kale ku faaneen.

“Kuwa hadda jooga hadaad doorataan waxay rabaan nay adduunyada idin gefiyaan oo aakhiro idiin diraan, anuguna waxaan rabaa inaadan adduunyada gefin oo aad cuntaan nasiibkiina” ayuu sii raaciyey.

Salaad Cali Jeelle oo ereyadiisa lagu soo dhoweeyay qosol iyo sacab ayaa markale u soo laabtay waxyaabaha uu qabanayo.

“Waan ogahay inaanan qaban karin laakiin dadkii waa ku daalay. Anigaa hadaad i dooratiin waxaasoo dhan ayaan qaban karaa” ayuu yiri.  “Soomaaliya waxaan u sameynayaa saaxiibo istaraatiiji ah” ayuu sii raaciyey.

Wuxuu sheegay inuu qoxootiga Soomaalida dalka ku soo celinayo kiwa gudaha joogana uu daryeelayo, isagoo ku goodiyey inuu saacado ku tirtirayo xagjirka iyo burcad badeeda.

“Maxaa yeelay kii ay u baahnaayeen ayaan ahay” ayuu sii raaciyey.

Salaad Cali Jeelle ayaa si gaar ah u soo qaatay in $130 milyan oo doolar laga xaday dawlada isagoo sheegay in baaramaanka uu ka codsanayo inay lacagta “LAALUUSHKA” ka qaataan musharixiinta kale kadibna ay isaga [Salaad] siiyaan codkooda si uu madaxweyne u noqdo.

“Aniga idin dhihi maayo waan idinka “codsanayaa” ee waxaan idin dhahayaa baarlamaanoow waxaan “idinka tuugayaa” inaa codkiina i siisiin, maxaa yeelay gobolkaan ka soo jeedo waxaa laga yaqaanaa wax la dhaho tuugitaan” ayuu markale ku nuuxnuuxsaday Salaad oo baarlamaanka ka hor khudbeynayey.

“Lacagna waa qaadasho, codkana waa Salaad Cali Jeelle”ayuu yiri isagoo qoslayey.

SNM ayaan ahaa

Salaad Cali Jeelle wuxuu khudnadiisa ku guda galay qaabka uu is leeyahay dib u heshiisiinta dalka waa loo wajihi karaa isagoo sheegay inuu maamulka Somaliland la furayo wadahadal.

“Somaliland waxaan la yeelaneynaa wadahadal waxaana hubaa inaan ka mira keeneyno maxaa yeelay aniga ayaaba ahaa jabhadii SNM..” ayuu sii raaciyey hadalkiisa.

 

RBC Radio