Safiirka Soomaaliya ee Siiriya : Naftii hure! W/Q Gen Mohamed Osman Qaddi

Safiirka Soomaaliya ee Siiriya : Naftii hure!
Gen Mohamed Osman Qaddi
godobjr1@yahoo.com
Sabteembar 14 2012

Qoraalkan waa mid aan ula jeedo inaan kula socodsiiyo ummadda Somaliyeed iyo dowladda la filayo inay dhowaan ka curato waddanka, in Ambassador Bashiir Xaaji Cismaan oo ah sii hayaha safaaradda Soomaaliya ee dalka Suuriya uu yahay muwaadhin Soomaaliyeed oo dhab ahaan u taagan xilka Dan-jirenimo ee uu u hayo dadka Soomaaliyeed.

Waxaan rabaa inaan cadeeyo inta aan ogahay anigoo waliba ah nin oday ah soona shaqeeyay aaminsana inaan xog ogaal ahay ilaa iyo xad in Ambassador Bashiir Xaaji Cismaanoo ah sii hayah Safaaradda Soomaaliyeed ee Suuriya uu yahay muwaadhin wanaagsan oo naftiisa u huray, isla markaasna xil weyn iska saaray inuu si daacadnimo, karti iyo hufnaan-ba leh uu wax ugu qabto dadwaynaha Somaliyeed ee deggan Siriya isagoo ay isugu mid-yihihiin oon u kala saarin hayb-hayb iyo qabiil, wuxuuna ugu shaqeeyaa si mas’uuliyad ay ku dheehantahay iyo daacadnimo inta aan ogahay karaankiisa ah.

Ka dib markii ay dagaalladu ka bilowdeen gudaha waddanka aan walaalaha nahay ee Siiriya, arrimaha geesinnimada leh oo uu muujiyey Safiirka waxaa ka mid ah inuu naftiisa u huro dad-weynaha Somaliyeed oo asagoo og khtaraha jira iyo colaadda inta ay la egtahay ayuusan hadana u aabo yeelin intaas oo dhan ee uu qoys kasta oo dhibaataysan oo Soomaali ah ugu tagaa meeshooda si uu dhibka uga soo badbaadiyo.

Bashiir (waa safiirkee) waa nin inta aan ka bartay ay ixtiraam iyo qaddarin-ba ay u wada hayaan xukuumadda iyo dadweynaha Siiriya, asaguna mar waliba u rajeeya walaalahayo reer Siiriya khayr badan, lana jecel in ay ku wada noolaadaan nabad, barwaaqo iyo bash-bash.

Haddii aan nahay Somali, markii uu qarankeenii burburay dagaalladii ehelka ahaana ay ina aafeeyeen, marnaba ma ilaawi Karno sidii ay Siiriya aydoo isku duuban dawlad iyo dadwaynaba ay noogu soo gurmatey oo ay noogu soo dhaweeyeen dhulkooda markii ay na diideen dowlado kale oo Carbeed.

Waxaa nagu waajib ah inaannu ka fogaanno faafinta xumaha, fidnada iyo wixii kala geynaya ama isku diriya Ummadda Somaliyeed, waxaan filayaa inay nagu filantahay 22 sano oo aan ku nooleyn qabiil iyo is dil, dhac iyo boob , qax iyo gaajo, cuduriyo tuugsi, dullinimo, hoog iyo baaba’ naga reebay asaageen.

Mudane Bashir waa aqoon-yahan, dhallin yaro ah, Allana uu ku mannaystay xikmad iyo caqli ballaran, asaga iyo kuwa la midka ah waa inaannu soo dhaweynaa oo dhiiri gelinaa, waxaa nagu waajib ah inaan tilmaanno oo sheegno wixii khayr ah, si loogu daydo dhiiri gelinna ugu noqoto dhalinta yar-yar iyo jiilalka soo koraya isla markaasna ay ugu daydaan dadkeena wanwanaagsan, si ay u horseedaan aayo wanaagsan oo oo lagu gaaro barwaaqo iyo baraare..

“Soomaaliya Ha Noolaato”