Tartanka Iyo Ololaha Marwooyinka Shariif Iyo Gaas Halkee ayuu Marayaa?

Muqdisho (RBC Radio) Xili ay musharixiin  yahiin Madaxda Sare ee Waqtigoodii Dhamaaday ee Shariif Sheekh Axmed iyo C/wali Maxamed Cali Gaas ayaa hadana, ololaha labada dhinac waxaa qayb ka ah Marwooyinka labadaan masuul.

Marwooyinka Madaxweynaha Waqtigiisu Dhamaaday iyo R/Wasaaraha Waqtigiisu Dhamaaday ayaa waxay qaabileen haweynka ku jira baarlamaanka Soomaaliya waxayna u sameeyeen kulan balaaran oo qado ah.

Kulamadaan oo ay ka soo qayb galeen xildhibaano badan oo ah haweynka ka tirsan baarlamaanka Soomaaliya ayaa waxaa uu qayb ka ahaa olalaha Shariif iyo Gaas hada Waqtigoodii dhamaaday loogu samaynayo in loo doorto xilka Madaxwenenimo ee dalka Soomaaliya.

Xaflada Xaasaska Madaxweyne Shariif

Xildhibaanad Khadiijo Maxamed Diiriye oo ka mid ah Xildhibaannada Haweenka ah ee ku jira Baarlamaanka Dalka oo Munaasabadda Khudbad ka jeedisay ayaa uga mahad celisay Marwooyinka Madaxweynaha Dalka qado sharaftan ay u sameeyeen Haweenka Soomaaliyeed waxaana Xildhibaanaddu ay ka sheekeysay waxqabadka Madaxweynaha Jamhuuriyadda mudadii uu xilka hayey.

“waxaan ka mid ahaa gudiga doorashada sida aad la socotaan balse hada xilkaasi waan ka tanaasulay sababta aan uga tanaasulayna waxey tahay inaan Madaxweynaha garab istaago waayo hadaad gudi ku jirtid waa inaad dhex dhexaad laakiin anigu waxaan aaminsanahay meesha aan maanta taagannahay ee horumarka jira waxaa sabab u ah Madaxweynaha Soomaalina waxey tiraahdaa qabyo ninkeeda ayaa dhameystira, si aan hormarkeenna u dhameystiranno ayaanna Madaxweynaha u wada garab istaageynaa hadaan nahay Haweenka Soomaaliyeed ee Baarlamaanka ku jira”ayey hadalkeeda kusoo gebagebeysay Xildhibaanad Khadiijo Maxamed Diiriye.

Marwo Faadumo Cumar oo ka mid ah Marwooyinka Sh Shariif oo khudbad kooban ka jeedisay Munaasabadda ayaa Haweenka Soomaaliyeed uga mahad celisay kasoo qeybgalka Casuumadda ay u fidiyeen waxaana ay Marwada Madaxweynaha Dalka faah faahin ka bixisay dhibaatooyinkii kala duwanaa ee ay la kulmeen Haweenka intii dalka uu ku jiray bur burka.

“gabdhaha xildhibaannada waxaad muujiseen dadaal dheeraad ah waxaad muujiseen sabar waayo wixii la idiin siiyey waad ku sabarteen waadna qaadateen hadana sida muuqata diyaar ayaad u tihiin,si dhibaatooyinka ay Haweenka la kulmaan loo yareeyo oo aan ognahay iney dibadaha ku dhibaateysan yihiin oo maalin walba carruurtooda laga qaato waxaan idinku guubaabinayaa inaad dhexda xerataan insha Allah rajadu maxuma” ayey tiri Marwo Faadumo Cumar oo ka mid ah Marwooyinka Madaxweynaha Jamhuuriyadda.

Ugu dambeyntii Marwada Madaxweynihii hore Marwo Faadumo Cumar waxey Haweenka Soomaaliyeed iyo guud ahaan Shacabkaba Alle uga bariday inuu dhibaatada ka dul qaado.

Xaflada Xaaska R/Wasaare C/Wali Gaas

Ugu horeyn waxaa goobta ka hadashay Marwo: Sahra Qorsheel oo ka mid ah Xildhibaanada Soomaaliyeed, Iyadoona sheegtay in haweenka Soomaaliyeed ay noqdaan kuwa midowbay oo aayahooda ka tashada islamarkaana ay yeeshaan cod wada jir ah.

“haweenka Soomaaliyeed waxay soo mareen halgan dheer balse waxaa loo baahan yahay maanta in aan ka tashadaan mustaqbalkooda siyaasadeed si loo tuso Raga in Dumarka Soomaaliyeed lee yihiin codka ugu badan, taasna waxaa lagu gaari karaa in haweenka Soomaaliyeed ay ka tagaan nin jecleysiga, qabyaaladda, Lacag doonka, waan in dalka iyo dadkaba maanta ugu hiilinaa codkeena waxaadna ogtihiin in haweenka codkooda dhinucuu raaco guusha ayaa raaceyso marka xubnaha Baarlamaanka dardaaran baan oronayaa”

“Xukuumadaan waxay muujisay isbadal aanay dalka ka qaban Xukuumadiihii ka horeeyey waxaana muuqata in Dr.Cabdiweli maanta marka uu xilka wareejinayo inuusan dalka ugu tagayn qabyo oo uu dhameystirey dowladnimada Soomaaliya oo uu ka saaray KMG, marka waxaan idin leeyahay idinkoo u fiirsanaya waxaa ila sax ah in Cabdiweli uu yahay shaqsiga ugu haboon oo dalka wax u soo qabtay, shaqada soo socotana aan ku aamini karno oo aan kalsooni buuxdo ku dooran karno”

Wasiiradda Haweenka iyo Arrimaha qoyska Soomaaliya ee Xukuumadii C/Wali Gaas ee Waqtigeedu Dhamaaday Marwo Maryan Aweys ayaa xustay doorka haweenka Soomaaliyeed ay ku leeyihiin siyaasadda dalka, loona baahan yahay in haweenku la yimaadaan midnimo, Islamarkaana tilmaamtay in Xukuumadu isbadal badan ku samaysay horumarka Dumarka taasna amaanteeda leeyahay Ra’iisul Wasaare Cabdiweli.

Marwo Hodon Siciid Ciise ayaa u mahadcelisay ka soo qeybgalayaasha Casho Sharafta waxeyna marwada u sheegtay haweenkii ka soo qeybgalay xaflada in halgankii dumarka uusan wali dhamaan sidaas daraadeedna loo baahan yahay in xildhibaanada dumarka ah ay noqdaan muruqa haweenka Soomaaliyeed oo ay ku hadlaan codka dumarka ay ma talaan doodahoodana ku muujiyaan sidii loo hormarin lahaa dumarka.

Ugu dambeyntii Ra’iisul Wasaarahii hore ee Waqtigiisu Dhamaaday Dr. Cabdiweli Maxamed Cali Gaas ayaa sheegay in xukuumadiisa ay ka shaqeysay in haweenka Soomaaliyeed ay helaan qondada ah 30% balse iminka ay muuqato in 17% ay heleen uu rajeynayo in wax badan ka qaban doono arrimaha haweenka hadii uu ku guulaysto tartanka madaxweynanimada Soomaaliya.

RBC Radio

Xafiiska Wararka Muqdisho