Guddiga doorashooyinka Somaliland oo Digniin u diray Ururrada iyo Xisbiyada Siyaasadda
Xuquuqda Qoraalada, sawirada iyo warbixin kasta waxay gaar u tahay Raxanreeb.com (RBC Radio). Lama adeegsan karo, dib looma daabici karo, lama baahin karo ama kambayuutar laguma keydsan karo si toos ah iyo si dadban intuba, haddii aan fasax laga heysan maamulka Raxanreeb.com (RBC Radio). Fadlan hana xadin
Hargeysa(RBC):- Guddiga doorashooyinka Somaliland, ayaa Ururrada siyaasadda iyo Xisbiyada tartanka doorashada dawladaha hoose ee qabsoomaysa 28/11/2012, ugu baaqay inay joojiyaan isticmaalka iyo muujinta lambarrada astaanta u ah musharrixiinta Urur kasta iyo Xisbi walba gaarka u yeelanayaan oo aanay weli ku dhawaaqin Guddigu.
Qoraal kooban oo uu maanta soo saaray, kuna saxeexnaa Guddoomiyaha Guddiga doorashooyinka Somaliland Ciise Yuusuf Maxamed (Ciise-Xamari), ayuu ku sheegay inaan Ururrada iyo Xisbiyada doorashada galaya loo oggolayn inay muujiyaan astaamaha musharrixiintooda oo degmo kasta lambarro la kala siiyey, illaa inta ay Guddi ahaan si rasmi ah u soo bandhigayaan maalmaha soo socda.
Waxaa uu qoraalkaa uu Guddoomiyaha Guddiga doorashooyinka Somaliland kula hadlay Ururrada iyo Xisbiyada siyaasadda oo warbaahinta loo qaybiyey u dhignaa sidan:-
“Ku dhammaan Ururrada iyo Xisbiyada Siyaasadda Somaliland.
Waxaa laydin ogeysiinayaa inaanay Ururrada iyo Xisbiyada ka qaybgalaya doorashada golayaasha deegaanka aanay samaynsan karin lambarrada astaanta u ah musharrixiinta, inta ka horreysa waqtiga Komishanka doorashooyinka Qaranku soo saarayo lambarrada rasmiga ah ee Musharrixiinta.”
Qoraalkan Guddiga doorashooyinku soo saareen ayaa yimi ka dib markii labadii maalmood ee u dambeeyey qaar ka tirsan Musharrixiinta Ururrada siyaasadda ay boodhadh ku soo sawirteen sawirradooda iyo lambarka astaanta u ah ee Guddiga doorashooyinku ugu talogaleen in loogu codeeyo, kuwaasoo suuqyada magaalada Hargeysa lagu arkayey, magaaladana ay dhex-marayeen Gaadiid kala duwan oo boodhadhkaas lagu dhejiyey.
RBC Radio
Xafiiska wararka ee Hargeysa.
[...] Read the article: Guddiga doorashooyinka Somaliland oo Digniin u diray Ururrada iyo Xisbiyada Siyaasadda [...]