XOG: Maxaa Ka Jira In Sirdoonka Yuhuuda Ay Ka Qeybqaateen Duulaankii Kismaayo?

Nairobi (RBC) Sida uu shaaciyey wargeys caan ah oo ay Yuhuudu leedahay ciidamo sirdoonka Yuhuuda ah ayaa gacan ka geystay duulaankii ciidamada Kenya ay magaalada Kismaayo kaga saareen ururka Al-Shabaab toddobaadkii hore kaasoo soo socday mudo hal sano ah oo ay ciidamada Kenya ku jireen gudaha Soomaaliya.

Wargeyskan oo lagu magacaabo Debka [http://www.debka.co.il] ayaa warbixin uu daabacay 30-ka Sebtember, 2012 wuxuu ku cadeeyay in “mahada ugu weyn ee duulaanka Kismaayo ay qaadaneyso Yuhuuda [Israaiil] oo ku caawisay ciidamada Kenya saddex dhinac oo muhim u ah kaartada dagaalka, taasoo ciidamada Kenya la’aantood aysan ka guuleysteen Al-Shabaab.

Haddaba waxaan halkan ku soo gudbineynaa qormada wargeyska ee soo baxday 30/09/2012 oo sideeda ah, kuna qoran afka Cibriga [ee Yuhuuda] iyo meelaha qaar oo Af Soomaali aanu ku tarjunay.

Cinwaanka wargeyska uu siiyey qormada ayaa ahayd;

Oo micneheedu yahay “Guusha weyn ee Kenya ka gaartay Al-Qaacidada Soomaaliya, muhimada ay lahayd Istaraatiijiyada Israa’iil“.

Faalada wargeyska ayaa ugu horeyn ka hadashay mudada sanadka ee ka soo bilaabatay Bishii Oktoobar 16-keeda sanadkii hore 2011, ee ay ciidamada Kenya la harjadayeen dagaalyahanada Al-Shabaab oo bilawgii hore lagu eedeeyay inay ka dambeeyeen weeraro dilal ah iyo afduubyo dad ajaaniib ah loo geystay oo gudaha Kenya laga soo fuliyey.

Wuxuu leeyahay wargeysku xitaa wadamada reer Galbeedka oo Mareykanka ugu horeeyo ma aysan fileyn in Kenyanka si fudud Al-Shabaab uga qabsan karaan magaalada Kismaayo, isagoo wargeysku dib u soo xusay fashilkii Mareykanka ka soo gaaray dagaalkii Maleeshiyaadkii Gen Caydiid ee Muqdisho ku dhexmaray ciidamada “Rangers” iyo maleeshiyaadkii SNA ee sanadkii 1993 iyo duulaankii ciidamada Ethiopia ee Soomaaliya ee sanadkii 2006 kuwaasoo wargeysku leeyahay dhamaantood waxay ahaayeen hawlgalo guuldareystay.

Debka Waxaa qormadiisa ka mid ahaa “….

“..Sanad ka hor khubarada dagaalka ee reer Galbeedka oo ay xitaa ku jiraa Amerikaanka, ma aysan aaminsaneyn in tirada 60,000 askari ee Kenyanka ah ay qabsan karaan qeyb weyn oo ka mid ah dal sida “Soomaaliya oo kale” ayna ka guuleysan karaan maleeshiyo sisa Al-Shabaab oo heysata 25,000 ciidan ah, Hawlgal ay ku fashilmeen ciidamada aadka loo qadariyo ee Mareykanka sanadkii 1993 iyo ciidamada Ethiopia sanadkii 2006 oo ay soo gaartay khasaare weyn…”

Gacanta muuqata ee Israa’iil

Wargeyska ayaa sheegay in mahadcelinta koowaad ee duulaanka Kismaayo ay yeelaneyso Israa’iil xitaa haddii buu yiri [wargeysku] aaney Israa’iil iyo Kenya arintaasi qirin!!!

Arintaasi markii uu ka hadlay Debka waxaa uu yiri;

Oo micnaheedu yahay “Mahada waxaa iska leh talada Israa’iil iyo joogitaanka ciidankeeda sirta iyo khubarada la-dagaalanka argagixisada ay joogaan labo ka mid ah magaalooyinka waaweyn ee Kenya oo ay Al-Shabaab ku dhiiran weyday inay qaraxyo waaweyn ka sameeyaan..”

Kaalmada Saddex jiho

Sida wargeysku sheegayo Yuhuudu waxay hawlgalka Kismaayo ka geysatay caawimaad saddex dhinac ah oo [sida wargeysku leeyahay] Kenya u fududeysay inay magaalada Kismaayo ka saarto kooxda Al-Shabaab.

Wuxuuna wargeysku uu sharaxay saddexda jiho ee Israa’iil ka caawintay Kenya, taasoo uu u faahfaahiyey sidan;

“Inkastoo Dawladaha Nairobi iyo Jerusalem aysan hal erey xitaa ka soo qaadin ku lug lahaanshaha Israa’iil ee dagaalkan, hadana Israa’iil waxay dagaalkan militari iyo midka sirdoon ka qaadaneysaa saddex jiho oo waaweyn;

Wargeyska waxaa uu sheegayaa saddexdaasi jiho waxay yihiin;

Mida koowaad: Saraakiisha Israa’iil ayaa si toos ah ugu lug lahaa qorsheynta hawlgalada qaaciga ee ciidamada Kenya iyadoo talooyina ay siinayeen ciidamada hawlgalada gaarka ah ee Kenyanka ee ku jira safka hore ee dagaalka Al-Shabaabka Soomaaliya..

Ciidamada Kenya waxay kaloo xeelado suurtagaliyey in dhul badan lagu qabsado ka heleen sarakiisha Israa’iil oo ay barbar socotay duqeymo hab nidaamsan u socday si maleeshiyada Al-Shabaab ee Al-Qaacida daacada u ah loo jabiyo.

Mida labaad:  Israa’iil waxay ciidamada Kenya siisay hubka ku haboon dagaalka noocan ah oo ay ku jiraan calaamado, tilmaamo iyo qalabka sirdoonka.

Mida saddexaad: Cutubyo ka mid ah booliska, sirdoonka Mosad iyo ciidamo gaar ah oo ka tirsan kooxaha la dagaalanka argagixisada iyo amaanka qaranka Israa’iil ayaa kula taliyey Kenya inay ka hirtagaan weeraro argagixisanimo oo ka dhici lahaa gudaha Kenya.

Wadamada Faransiiska iyo Mareykanka, ayuu sidoo kale wargeysku sheegay in taageero dhanka badda iyo cirka ay siiyeen ciidamada Kenya tan iyo markii ay gudaha u gashay Soomaaliya sanadkii hore.

Waa markii ugu horeyay oo askarta Yuhuuda ay ka qeybqaataan hawlgalka gudaha Soomaaliya ka dhacay iyadoo horey dawlada Kenya codsi ay ugu dirsatay Israa’iil kaasoo ku wajahnaa in lagu taageero hawlgalada Soomaaliya halka wadamo Carbeedna ay weydiisatay Kenya dhaqaale walow Carabta aysan ka soo jawaabin dalabka Kenya.

Faahfaahinta wargeyskan uu soo bandhigay ayaa durba calaamad su’aal gelineysa qaabka ay u socdaan hawlgalada ciidamada Kenya iyadoo dawlada Soomaaliya illaa hadda aysan ka hadlin wararka soo shaacbaxay ee ku sabsan in Israa’iil lug ku lahayd duulaankii Kismaayo.

 

Tixraaca wargeyska; http://www.debka.co.il

 

RBC Radio

————————————————————————————-
Fiiro gaar ah: -Tarjumaada waxaa naga caawiyey; google translator