Boosaaso oo fiday, Ganacsigeedii oo Baahay, iyo dadkeedii oo tarmay (Warbixin + Sawirro)

Garoowe( RBC Radio)Tan iyo Burburkii Somaliya kadib waxaa hoos u dhac ku yimid guud ahaan nolosha   dadka   Soomaalida marka la eego dhanka Ganacsiga Amaanka Waxbarashada iyo waliba Caafimaadka iyadoo taas bedelkeed la dhex maquurtay dilal sokeeye iyo dhaawacyo  xoogan oo loo geystay qarankii adkaa ee Somaliya la oran jiray waawayo waayo ahaana libaaxii geeska  Africa.

 

Burburkii ku yimid dalka  wuxuu saamayn ku yeeshay kubucii ku socday Deegaanada Soomaalida iyo horusocdka bilicda Magaalooyinka, mudo kadibse dalku wuxuu muquurtay marxalado kala duwan waxaana dib loo helay kalsooni aan cago badan ku taaganayn iyo in la kaabo kaabayaasha dhaqaale kan aqooneed iyo kan caafimaad ee qaranka inkastoo Soomali wayn aysan wali sidii la rabay isugu soo xirmin.

 

 

Magaalada Bosaaso ee Xarunta Gobolka Bari ee  Puntland waxay ka mid tahay Magaalooyinka 10kii Sano ee ugu  dambeeyey ay ka muuqatay horumar dhanka Ganacsiga, dhismaha iyo tirada dadwaynahaba isku darsatay ayna ka wada shaqa galaan dhamaan Dadka wada daga Gobolada Somalia, Magaalada Waxay leedahay Dakadd iyo Garoon diyaarad oo ganacsiga ka socdaa uu yahay mid baaxadleh.

 

 

 

Magaalada Boosaaso oo aan dhawaan hawlo shaqo ku tagay ayaa waxaa si wayn uga muuqday is bedel dhanka dhismaha  ah iyadoo xiliyadii ugu dambeeyey Magaalada ay maalgashi ku sameysanayeen qurba joogta u dhalatay puntland kuwaasi oo dhismayaal casri ah ka hirgaliyay  xaafadaha ay Magaalada  ay ka kooban tahay, waxaa sidoo kale jira shirkado dhismayaasha ku shaqo leh oo ku yaala Magaalada sida shirkada Mubarak Group Of Companies iyo shirkado kale oo Magaalada ka wada Mashaariic balaaran oo Dabaqyo bilic wanaagsan looga hirgelinayo  Ganacsi iyo Dad badnina ay usii dheertahay.

 

 

Dabaqa ugu dheer iminka Puntland oo Gacanta lagu hayo ayaa waxaa dhismihiisa Gacanta ku haysa Shirkada Mubarak  iyadoo loo dhisayo shirkada isgaarsiinta ee Golis dabaqaasi ayaa wuxuu ka kooban yahay 7biyaano  iyadoo sidoo kale iminka Gacanta laga jari rabo Dabaq loo dhisayay shirkada Iftin Bank ee Magaalada Bosaaso oo isla Mubarak ay Dhisayso, Bosaaso ayaa ah marka si gaar ah loo eego meel mashquul badan oo dadka ku nooli ay u badan yihiin Ganacsato kuwaasi oo aroortii ku kalaha goobohooda shaqada waxaana ku yar dadka shaqo la’aanta ah kadib odoros  dheer oo aan sameeyey.

 

 

Dakadda Wayn ee Magaalada oo aan booqasho ku tagay ayaa waxaa ka muuqday xoolo farabadan oo tirabeel ah kuwaasi  oo loo dhoofinayay dibadaha waxaa sidoo kale dakadda ka muuqday alaab u badnayd raashin iyo bagaash kala duwan oo ganacsato ay usoo dagaysay , Maamulka Dakadda ayaa ii xaqiijiyay in goobtu mashquulkeedu badan yahay ayna jiraan dad ay alaabo uga soo dagaan Dakadda oo ku sugan Gobolada Koofureed kuwa Dhexe iyo Waqooyiga, Hawlaha dakadduna ay si xawli ah u socdaan.

 

 

Garoonka Diyaaradaha Bandar Qaasim oo ka mid ahaa Goobihi aan tagay ayaa waxaa iiga muuqanayay Dhismayaal Bilic  wanaag ah iyadoo wali Garoonku uu ku socdo Dayactir oo aan wali la dhameystirin ,waxaa garoonka Dhinacyadiisa iyo gudihiisaba ku beeran dhir kala duwan, wuxuu garoonku sidoo kale leeyahay Baakino Dhaadheer oo la dhigto Gawaarida, waxaa sidoo kale garoonka ka Furan Meherado Raashin kala duwan lagu sameeyo, wuxuu kaloo leeyahay Adeegyada kala duwan ee shirkadaha iyo wixii kale ee Magaalo looga baahdo.

 

 

Inku dhaw Sagaal Boqol oo kun oo qof ayaa ku nool Magaalada waxaana Kubuca Magaalada Keenay ganacsiga  Dhaqaalaha Dakadda iyo Mashaariicaha Dalka laga fulinayo waxaana intaasi gun dhig u ah Amniga Magaalada sidaana waxaa Raxan-Reeb ku yiri Xassan Cabdalla Xassan Duqa Degmada Bosaaso Mar aan Xafiiskiisa ku booqday, Duqu wuxuu cadeeyey Magaalada in uu ka socdo Hormar Baaxad leh ayna iska kaashadeen Dowlada Ganacsatada iyo Dadwaynahaba wuxuuna ku baaqay in Ganacsiga iyo Dhaqaalaha kor loo qaado maadaama ay Bosaaso Loolan kula Jirto Magaalooyin badan oo Gobolada Qaar ee Soomaaliya Ku yaala.

 

Magaalada ayaa waxaa laga dhisay Wadooyin laami ah kadib iskaashi wadareed dhex maray Maamulka Degmada iyo  Ganacsatada kaasi oo laga hirgeliyay xaafado ka mid ah Magaalada kaasi oo qayb ka ah isbedelka Sanadahan dambe ku yimid Magaalada Bosaso ee Xarunta Gobolka bari, Sidoo kale waxaa wadooyin waasac ah laga yagleelay  Suuqa weyn ee Ganacsiga Bosaso kaasi oo Dhawr jeer oo uu gubtay ay ku hanti beeleen dad badan oo ganacsato ah kadib markii uu Qasaarahaasi soo noqnoqday ayaa Dowladu go’aan ku gaadhay in wadooyin laga hirgeliyo Hareeraha Suuqa  waxaana taasi uu meesha ka saaray in markale suuqu uu gubto iyadoo Bilicda Magaalada iyo Suuquna uu dib usoo noqday.

 

Magaalada Xeebeedka Boosaaso oo ah Isha ganacsiga Puntland iyo Somaliyaba ayaa xiligan u muuqata mid dhanwalba  ka hormarsan walina sii baahaysa iyadoo himilada ganacsato iyo wax garad badan oo aan la sheekeystay ay ii sheegeen in ay rajeynayaan in ay muujiyaan waxtar baaxad leh iyo bilic ka duwan mida hada bosaaso laga hirgashay, Bosaaso oo ah meel Ganacsi ayaa waxaa ku nool Qabaa’ilo kala Duwan kuwaasi oo u siman ganacsiga Magaalada Iyo sharcigaba.

 

Ibraahim Muuse Dahraan (Wadani )

Wakiilka Raxan-Reeb) Garowe.

Use Facebook to Comment on this Post