Maamulka Degmada Hodan Oo Dadka Ku Ganacsada Suuqa Siigaale Ugu Baaqay Iney Ka Guuraan Suuqaas

Muqdisho(RBC Radio) Maamulka degmada Hodan ayaa ugu baaqay shacabka ku ganacsaday suuq kamid ah suuqyada kuyaala degmadaas iney gabi ahaanba iskga guuraan suuqaas gudoomiyaha degmada Hodan  Cabdi Maxamed Dhabaneey oo saxaafada la hadlayey ayaa ugu baaqay in shacabka ku ganacsada suuqa Siigaale ee degmadaas ay banneeyaan suuqaas isagoona sheegay in marka ay dadka ka saaraan ay dib u dhis ku bilaabi doonaan suuqaas oo si weyn ugu burburay dagaaladii dalka ka dhacay.

Gudoomiye dhabaneey ayaa tilmaamay in ganacsatada goobaha ganacsi ku leh suuqaas ay si ded deg ah uga guuraan suuqaas si dayactir loogu sameeyo suuqaas, mar la weydiiyey in dadka ay ka saarayaan suuqaas ay u diyaariyeen goobtii ay u guuri lahaayeen ayaa waxa uu gudoomiyuhu meesha ka saaray iney goob kale u diyaariyeen dadkaas isagoona sheegay in suuqu uu yahay goob ka wada dhexeysa bulsho weynta Soomaaliyeed sidaas darteedna ay muhiim tahay in la baneeyo suuqaas si dib u dhis iyo dib u habayn loogu samayn lahaa.

Ganacsatada xiligan goobaha ganacsi ku leh suuqaas ayaa cabasho ka muujinaya go’aanka kasoo baxay maamulka degmada Hodan ee ku aadan iney ka baxaan suuqaas,waxayna ka codsadeen maamulka gobolka banaadir inuu u diyaaro goobo  kale oo ay ku ganacsadaan marka ay ka guuraan suuqa Siigaale oo ay mudooyinkii lasoo dhaafay ku ganacsan jireen.

 

 

RBC Radio

Use Facebook to Comment on this Post