Madaxweyne Cabdirixmaan Maxamed Oo 4-Sanno U Dabaaldegay Waxqabadka Dowladiisa [Sawirro]

Boosaaso[RBC Radio] Madaxweynaha Dawladda Puntland Cabdirixmaan Maxamed Maxamuud Farole oo Xaflad Socotay Shalay Galab ilaa Xalay ku Qabsaday Guriga Madaxtooyada ee Boosaaso kaga Hadlay arrimo badan oo khuseeya Waxqabadkiisa 4-sanno ee uu Xafiiska Joogay.

Sanadguuradda 4-aad ee Xukuumadda Puntland oo si heersare ah loo soo Qabanqaabiyey ayaa waxaa kasoo qeybgalay Madaxweynaha Puntland Cabdirixmaan,Golihiisa Wasiiradda,Guddoomiye Kuxigeenka Baarlamaanka Salaad Xareed Cali,Isimada,Waxgarad,Haween,Dhalinyaro,Culuma’udiin iyo marti sharaf kale.

Madaxweynaha Dawladda Puntland Cabdirixmaan Maxamed Maxamuud Farole oo khudbad dhinacyo badan ka hadleysay Kasoo Jeediyey Xafladda Sanadguuradda 4-aad ee Xukuumadiisa ayaa sheegay mudadii ay Xafiiska joogeen in Wayaabo farabadan ay wax ka qabteen sida:

01. Amniga.
02. Dhaqaalaha
03. Caafimaadka
04. Burcadbadeeda
05. Al-Shabaab
06. Mashaariicda Horumarinta Puntland.
07. Dawladda Federaalka Soomaaliya iyo arrimo badan.

Dawladba Kama Jirin Puntland.

Madaxweyne Cabdirixmaan Maxamed Maxamuud ayaa sheegay in in Maamulka hadda uu Hoggaamiyo marka ay la wareegeen Xilka uu amniga ahaa mid kala daadsan ayna kala Yaaceen Ciidamadii amniga sugi lahaa isla markaana ay Jirtay in yar oo Ciidamada kamid ahaa oon hawlba qaban karin.

,,,”"”" Waxaan la Wareegnay iyadoo Argagaxisadu ay meel walba dhigato Ukunta iyo Shabaagaha oo iyada kaliya laga baqaayey,Hay’adaha amnigana lacaayey oo lagu Sheegayey AL-SHAHAADA LA DIRIR,iyagoo iyagu iska dhigaaya kuwa Al-Shahaadada ku taagan dhiigyacabyadaasu Ummada dhiigeeda meel walba dhigay Soomaaliya oo dhan,..”"”ayuu yiti.

Waxa uu sheegay in Xafiiskaba qabteen iyadoo kooxaha Burcadbadeedu Iska dhex socdaan magaalooyinka dhanka kale afduub ba’an lagu hayey Shaqaalaha Hay’adaha u shaqeynaayey ee ka hawlgalaayey deegaanada Puntland.

…”"” Waxaanu Xafiiska qabanay iyadoo Burcadbadeedu ay meel walba sidey doonto Isaga Mushaaxeyso,Hay’adihii Caalamiga ahaa ee dalka ka Shaqeynaayey Shaqaalahoodii la afduubaayey,..”"”ayuu yiri Farole,

Sanadkii 2009 Iyo Xafiiska.

Madaxweynaha Puntland Cabdirixmaan Maxamed Maxamuud ayaa xusay in Sanadkii ugu horeeyey ee ay Xafiiska qabtaan 2009 uu bilaabay inuu Isku dubarido arrimo badan oo ay kamid yihiin:isu duwida amniga,soo uruurinta hay’adihii amniga,ka hawlgelintooda,dib u habeynta Dhaqaalaha ,Shuruuc u sameynta waxyaabaha amniga wax yeelaya sida Sharciga Argagaxisada la dagaalankeeda,Sharciga Burcadbadeeda la dagaalankeeda iyo Sharciga la dagaalanka Tahriibta.

Siyaasadda.

Madaxweyne Cabdirixmaan Maxamed Maxamuud ayaa ku sheegay Khudbadiisa in Puntland qeyb weyn ka qaadatay Dhismaha Dawladda Federaalka ee Soomaaliya ee Madaxweynaha ka yahay Xasan Shiikh Maxamuud,wuxuuna Intaas ku daray in guul weyn ay tahay iney ku guuleysteen ansixinta Dastuurka Puntland.

Dhaqaalaha.

Madaxweynaha ayaa Cadeeyey in dhaqaalaha Puntland uu hoos u dhaca ku yimid balse ay wax badan laga soo kabtay,isagoona intaas ku daray in bishii Dec 2011 ay lacagta Shilin Soomaaligu kor u kac laga dareemay Suuqyada Puntland taasina ayba keentay in Mushaaraadka Shaqaalaha qaarkood dawladdu ku bixiso Doolar.taasina Sababteeda ugu lahayd lacag Dollar oo Muqdisho kusoo fatahay xiligii ay socdeen qeybinta Mucaawinada.

…”"Dhaqaale burbur waa ka dhacay dalkaan,waxbaan kasoo kabnay,waan soo hagaajinay meel baan gaarsiinay laakiin Dec 2011 Shilinkii Soomaaliga ahaa baa kor u kacay Qiimihiisii,Doolarkii baa dhacay saameyn bey ku yeelatay dhaqaalaha Puntland,Soomaaliya oo dhan wey ku yeelatay gaar ahaan Inaga waxa inagu gaar ahaa Macaawinadii tirada badeyd oo lacag kaasha oo doolar ah la geliyey Koonfur,waxaa Koontara baan looga qaaday Puntland lacagtii Shilin Soomaaliga ahayd Inaguna ma aynaan daabaceyn,lacagtaas Yaraanteedii darteed,waxaa kor u kacay Shilinkii Soomaaliga ahaa ee Mushaarka lagu bixinaayey intuu Suuqa ka joogay,ilaa ay kaliftay Dawladu Mushaarooyin qaarkood iney ku bixiso Doolar….”"”“ayuu yiri.

Shidaalka Puntland.

Madaxweyne Faroole,waxa uu tilmaamay in marxalado kala duwan uu soo maray Baarista Shidaalka Puntland isla markaana hadda labada Ceel mid wax laga helay kan kale qorshuhu yahay in Sahan danbe lagu sameeyo.

…”"”Ceelashii labaas laga qoday mid waxbaa laga helay kan kale sidii la rabey waa noqon waayey dib baa loogu soo noqonayaa in Sahan danbe lagu cesho dabadeedna riiga lasoo celiyo oo la saaro Dharoor iyo Nugaal labadaba,marka haddaad aragteen birtii oo tagtay ha moodinina quus birtii waa soo noqoneysaa haddii Alle idmo,..”"”ayuu yiri

Khudbadda Madaxweynaha oo qaadatay 1-saa c isla markaana taabaneysay dhinacyo badan ayuu kaga hadlay sidoo kale Caafimaadka,Saxaafadda Dibadda,iyo arrimo kale,waxaase dadka qaar Isweydiinayeen Wakhtiga in uu ka dhamaaday iyo in kale Madaxweynaha halka Sanadkiisa Cusubna lagu soo dhaweeyey Heeso, iyo Ruwaayad Jaanta Isula helayeen Kooxda Waaberi Puntland.

____________________________________

Cismaan Turaabi
RBC Radio
Xafiiska Boosaaso

Use Facebook to Comment on this Post