Shariif Xasan, Wasiirka Maaliyada Mise Madaxweynaha Soomaaliya! (Shacabka oo La Yaaban)

Tan iyo intii dowlada Soomaaliya ay ka hawlgashay magaalada Muqdisho ee caasimada, waxaa dad badan oo Soomaaliyeed oo isugu jira kuwa ku dhow dowlada iyo kuwa hawlaha siyaasada dusha kala socda ku sii kordhayey su’aal aan weli laga jawaabin- Waxaase laga yaabaa in in badan ay su’aashaasi weydiinteeda ka daaleen oo ay hada ku halqabsadaan Shariifka Shariifka Wada .

Shariif Xasan, Wasiirka Maaliyada Mise Madaxweynaha Soomaaliya!

Madaxweyne Sheekh Shariif Sheekh Axmed waa madaxweynaha DKMG ee Soomaaliya, waxaana caadi ahaan aan wada ognahay in dowlada KMG ay xilal sare ka hayaan rag aad ugu dhow madaxweynaha weliba xubnihii ka tirsanaan jiray Golihii Isbahaysiga Dib u Xoreynta ee mar mucaaradka ahaan jiray, taasi runtii ma aha mid dadka Soomaaliyeed  ku cusub laakiin waxaa taagaan arin kale oo runtii xiiso u yeelatay ka hadalkeeda warbaahinta caalamka dhowaanahan.

Marka nin siyaasi ah uu awood dal qabsado ama loo doorto waa wax dhaca inay ku soo dhowaadaan oo baalasha ka galaan raggii saaxiibada ay ahaan jireen masuuliyada ka hor, dabcan markaasina waxaa kala cad awoodaha hogaamineed ee qof kasta weliba marka ay joogto arin ku saabsan maamul dowladeed oo u baahan go’aan qaadasho iyo tanaasul intuba, hase yeeshee waxaa u baahan inaanu fahano ayaa ah labada Shariif -”keebaa ah madaxweyne, keesa ah wasiirka maaliyada?.

Su’aashan dabcan waxay ka dhalatay wixii laga bartay dhaqamada labada Shariif intii ay ku jireen safarkii dalka Mareykanka, laga soo bilaabo kulanweynihii golaha loo dhan yahay ee Qaramada Midoobay ee bishii September dhamaadkeedii ka dhacay New York illaa intii wafdiga labada Shariif ay joogeen magaalada Columbus ee gobolka Ohio.

Kulankii  Qaramada Midoobay

Markii u furmay kulankii guud ee Qaramada Midoobay waxaa ka dhashay is faham la’aan dhexmartey wafdigii Soomaalida ee uu hogaaminayey madaxweyne Sheekh Shariif iyo shaqaalaha qaabilsan nidaamka xarunta Qaramada Midoobay, gaar ahaan kooxaha qaabilsan fadhiga “General Assembly” kuwaasi oo mudo saacado ah la murmayey ergada Soomaalida.

Arintaasi waxay ka dhalatay markii kursigii ku xigay kan madaxweynaha oo sharci ahaan uu leeyahay wasiirka arimaha dibada uu ku fariistay Shariif Xasan Sheekh Aadan oo ah wasiirka maaliyada iyo raisul wasaare ku xigeen. Kooxaha nidaamka qaabilsan ayaa u sheegay Shariif Xasan inuu baneeyo kursiga laakiin waa uu ka dhega adeygey dalabkaasi, waxayna arintaasi keentay heer saaxafada caalamka isugu soo ururto qeybtii ay hoolka ka fadhiyeen ergada Soomaalida. Dad badan waxay is weydiiyeen “TOLOW SHARIIF XASAN MA WASIIR DIBADEED BAA MISE WAA WASIIR MAALIYADEED?”.

Waxaa xusid mudan in caadi ahaan kulamada Qaramada Midoobay ay madaxweynaha ku wehlin karaan wasiirka dibada iyo safiirka joogta ee Qaramada Midoobay u fadhiya dowlada oo iyagu leh labada kursi ee kadambeeya madaxweynaha.

Jaaliyada Minnesota iyo Shariif Xasan

Waxaa intaa dheer in markii wafdiga madaxweynuhu u gudbay booqashadii Minnesota sidoo kale ay dheceen dhacdooyin kale oo la yaab leh oo uu ku kacay Shariif Xasan.

Sida la wada ogyahay Soomaalida Minnesota waxay dadaal badan u galeen sidii ay u soo dhoweyn lahaayeen wafdiga madaxweynaha Soomaaliya iyagoo mudo dhowr maalmood ah u diyaar garoobayey soo dhoweynta, waxaase dadaalkaasi dad badan uu caro iyo yaab isugu bedelay markii uu shaashadihii waaweynaa ee laga daawanayey uu madaxweynaha kala soo dhex muuqday Shariif Xasan, oo dadka qaar ay garan waayeen waxa uu yahay iyo xilka uu dowlada ka hayo.

Kulamadii uu madaxweynaha la yeelanay jaaliyada Minnesota lafteeda Shariif Xasan waxa uu dhex fadhiyey qolkii uu madaxweynaha ku qaabilayey jaaliyada oo qaarkood dano ka lahaayeen madaxweynaha.

Shariif Xasan oo loo maleeyey Madaxweyne!

Laakiin arinta ugu yaabka badnayd waxay ahayd tii ka dhacday magaalada Columbus ee gobolka Ohio markii hotelkii ay deganaayeen wafdiga ay boqasho ugu yimaadeen madaxweynaha qeybaha jaaliyada Soomaalida ee magaaladaasi oo iyagu qaab beeleed ugu tegey madaxweynaha.

Dad badan oo Soomaaliyeed, gaar ahaan odayaasha Soomaalida ayaa markii ay la fariisteen madaxweynaha waxay isku dayeen inay su’aalo xog wareysi ah kala yeeshaan xaalada dalka, laakiin yaabka yaabkiis waxaa su’aalihii ka jawaabayey Shariif Xasan.

Mid ka mid ah odayaashii qolka ku jirtay ayaa intuu yaabay waxa uu kala garan waayey labada “Shariif” markaasuu ku yiri isagoo Shariif Xasan la hadlaya “MUDANE MADAXWEYNE!”, laakiin Shariif Xasan oo qoslaya ayaa u sheegay inuusan isagu ahayn madaxweynaha ee uu yahay ninkan garab fadhiya.

Isla hotelka ay ka deganaayeen wafdiga ayaa habeenimadii Khamiista waxaa madaxweynaha ku soo booqday koox ka tirsan ardeyda jaamadaha ee magaalada Columbus kuwaasi oo madaxweynaha ula tegey su’aalo inay ka weydiiyaan dalka.

Mid ka mid ah ardeydii su’aalaha weydiineysay madaxweynaha ayaa weydiiyey su’aal ahayd “Madaxweyne adiga iyo Sheekh Xasan Daahir Aweys waxaad ahaydeen saaxiibo dhow mudo ka hor, hadda markii aad khudbada ka jeedineysey Mareykanka waxaad sheegtey in Xasan Daahir uu yahay argagixiso, isaguna waxa uu kugu tilmaamaa rido marka keebaanu rumeysanaa labadiina?” Sheekh Shariif ayaa su’aashaasi ka carooday isla markaana ka aamusay, hase ahaatee Shariif Xasan oo garab fadhiyey madaxweynaha ayaa ku yiri ardeygii “Yaa kuu soo qoray su’aashani, mar dambe ha weydiinin madaxweynaha!” ardeydii ku jirtay qolka qaabilaada waxay markaliya la anfariireen jawaabta uu bixiyey Shariif Xasan oo qaarkood kor u dheheen “OO SHARIIF ADIGU MA MADAXWEYNAHA AYAA TAHAY MISE WASIIRKA MAALIYADA?” laakiin nasiib daro Shariif Xasan oo malaha isaguna u muuqday inuu carooday ayaan ka jawaabin su’aasha dambe ee ardeyda ka soo turanturootay.

Dadka qaar ayaa arimahan u aaneynaya aqoon la’aanta dhinaca siyaasada ee heysata Shariif Xasan oo hadana masuul ka ah hay’ada maaliyada ee dalka.

Shariif Xasan waxa uu ahaa ganacsade ku noolaa dalka Kenya waxaana markii ugu horeysey ee lagu arko masraxa siyaasada ay ahayd sanadkii 2004 markaasi oo isagoo ku socday magaca bulshada rayidka uu noqday gudoomiyihii barlamanka ee dowladii C/laahi Yuusuf.

Waxaase jirta aragti kale oo dadka qaar qabaan taasi oo ah in madaxweyne Shariif oo kursiga siyaasada dhowaan heley uu doonayo in saaxiibkiis kala tashado wax kasta oo dowlada ku saabsan iyagoo ku dhaqmaya nidaamkii xernimada, laakiin dowladnimadu “xernimo” ma aha!.

Si kastaba saaxiibtinimada labada Shariif ayaa hadda u muuqata inay noqotey waxyeelo soo wajahday rajadii laga qabay dowlada KMG oo dad badan ay ka filayeen furfurnaan intaan ka badan.

W/Q: Cabdalle Muumin
RBC Radio Monitoring
e-mail: faaraxcali@gmail.com