Hay’ada PAC Oo Maanta Magaalada Gaalkacyo Ku Qabatey Xuska Munaasabada Maalinta Aidska Aduunka (Sawiro)

Munaasabada oo ka dhacdey Xarunta Wasaarada Haweenka iyo Horumarinta Qoyska ee Dawladda Puntland xafiiskeeda Gobolka Mudug ayaa waxaa ka soo qeyb galay Maamulka Magalada Gaalkacyo, Taliska Qeybta Gobolka Mudug, Ururada Bulshada rayidka ah, Aqoonyahano iyo dhamaan NGO-yada ka shaqeeya wacyi gelinta Cudurka AIDS-ka.

Waxaa ugu horey munaasabada furay Kuxigeenka Duqa Magaalada Gaalkacyo C/laahi Axmed Ibraahim (Macruuf) oo sheegay in uu ku faraxsan yahay inuu hadalo ka yiraahdo munaasabada ay isugu yimaadeen dadweyne aad u farabadan, intaa kadibna waxaa uu guda galay ereyo kooban oo uu ka yiri halista cudurkaasi uu leeyahay iyo in ay munaasib tahay in laga feejignaado sida ugu haboon, waxaa uuna baaq u jeediyay Waalidiinta Soomaaliyeed oo uu uga digey in aysan ka seexan asluubta ubadkooda.

Wakiilka Hay’ada PAC ee Gobolka Mudug C/qaadir Maxamuud Cabdi ayaa waxaa uu soo dhaweeyay dhamaan ka soo qeyb galayaasha kulanka, isla markaana mahad celin balaaran u jeediyay, isagoo halkaasi ka jeediyay khudbad uu qoraal ahaan u soo diray Madaxweynaha Dawladda Puntland ee Soomaaliyeed, Mudane C/raxmaan Maxamed Faroole, taasi oo ka hadlaysay AIDS-ka, waxayna khudbadu isugu jirtay fariimo wacyi gelin ah iyo dardaaran ku aadan in aan la fuquuqin oo aan la takoorin dadka la nool Cudurkaasi halista ah.

Kulankani munaasabada ah oo ay soo agaasimeen maamulka Hay’ada PAC ee Gobolka Mudug ayaa waxaa uu ku soo gaba gaboobay jawi wanaagsan, waxaana dhamaan ka soo qeyb galayaasha loogula dardaarmay in ay gaarsiiyaan bulshada ay ka yimaadeen ee aan nasiibka u yeelan in ay ka soo qeyb galaan kulanka halista cudurkani uu leeyahay.