Burcad Badeed Soomaali ah oo Xeebaha Yemen Ku Dishay Nin Kalluumeyste ah
Cadan, (RBC Radio) Wasaarada arimaha gudaha ee dalka Yemen ayaa xaqiijisay in burcad badeed Soomaali ah ay dileen ugu yaraan 1 nin oo kalluumeysatada Yemen ka mid ah ka dib markii burcad badeedu isku dayday inay weerarto dooni kalluumeysi oo Yemen laga leeyahay.
Saraakiisha amaanka ee gobolka Xadramout ee dalka Yemen ayaa sheegay in nin kalluumeyste ah oo lagu magacaabo Muxamad Khal Bawaseer laga war heley in lagu dilay xeebaha dalka Yemen kaasi oo ay toogteen burcad badeed Soomaali ah oo isku dayday inay dhacaan doon ay saarnaayeen 9 nin oo kalluumeysato Yemeniyin ah.
Lama oga halka ay ku dambeeyaan kalluumeysatadii kale iyo doontiiba, waxaana ciidamada Yemen ay sheegeen inay baadi goob ugu jiraan doonta iyo kalluumeysatada.
Ciidamada Yemen waxay ka shaki qabaan in burcad badeedu ay dhacday doonta si ay ugu gaadaan maraakiibta ay doonayaan inay qafaashaan. Burcad badeeda ayaa dhowr jeer oo hore sidan oo kale afduubay doonyo kalluumeysi oo laga leeyahay dalka Yemen.
Burcad badeeda Soomaalida ayaa weerarooda ku baahiyey xeebaha ka baxsan Soomaaliya halkaasi oo ay maraakiibta ku weeraraan iyagoo ka dibna ka dalbada in lacag madax furasho ah laga siiyo.
Warar kale ayaa sheegaya in xeebta galbeedka Yemen ay ku soo xiratay dooni ay la socdeen 9 nin oo kale oo kalluumeysato Yemeniyiin ah kuwaasi oo ay dhowaan qabatay dowlada Eritrea oo ku eedeysay inay si sharci darro ah ku galeen xeebaheeda.
RBC Radio
