Xisbul Islaam oo Soo Dhoweysay Qubuuro Burburinta Al Shabaab Ka Wado Muqdisho
Muqdisho (RBC Radio):-Ururka Xisbul Islama ayaa bogaadin iyo taageero u jeediyay howlaha qabuura qodida ah oo ay dhaq dhaqaaqa Al Shabaab ka wadaan degmooyinka gobalka Banaadir xilli wadaado iyo shacab reer Muqdisho ah kasoo horjeesteen qabuura qodida.
Sheekh Xaan Daahir Aweys Hogaamiyaha Ururka Xisbul Islaam wuxuu sheegay in Al Shabaab ay ku saxanyihiin burburinta qabuuraha suufida islamarkaana arrinkaasi yahay fal wanaagsan oo ku dayasha mudan sida uu hadalka u dhigay.
Aweys wuxuu sheegay in uu Indhihiisa ku arkay Dad Soomaali ah oo ku dawaafaya qabriga Macalin Biya Maalow degmada H/wadaag oo kamid ahaa meelihii ay shabaabku sida daran u burburiyeen.
“Camalka ay Shabaabku qabteen waa mid kheyr badan, soomaalidu caadada ayaa kala weyn diinta islaamka in qabriyada sida xun loo caabudo laburburiyo waa wax wanaagsan islaamka oo dhana waafaqsanyahay, aniga idinla hadlaya ayaa masjika macalin Biya maalow ku arkay dad ku dawaafaya oo leh waan cibaadaysanaynaa”ayu yiri Xasan daahir Aweys.
Xisbul Islaam oo khilaaf xoogan kala dhexeeyo Al Shabaab ayaa kamidaysan dhanka fikirka ay ku diidanyihiin dariiqooyinka suufida oo ay u arkaan in ay dhibaato ku yihiin Ururada salafiga ah ee ka aas aasmay dalka Soomaaliya.
Al Shabaab ayaa maalmihii lasoo dhaafay qabuura burburin iyo faagidba ka waday degmooyin katirsan magaalada Muqdisho waxayna banaanka soo dhigeen lafihii mashaa’ikh caan ah oo uu kamid ahaa sheekh Muxidiin Celi oo ku aasnaa waqooyiga Muqdisho.
Ramadaan Sheekh Mohamed RBC Radio magaalada Muqdisho
